Motors: Huis Tekna kry splinternuwe wiele
Huis Tekna, ’n tehuis vir verwaarloosde kinders in Bela-Bela, spog van Maandag 3 Augustus met ’n blinknuwe voertuig.
Dié meevaller is danksy ’n skenking van die Nasionale Lotery en is deur Waterberg Toyota afgelewer. Die kinders en personeel sal in die toekoms danksy hierdie reusegeskenk in weelde vervoer word.
Die tehuis huisves tans 45 kinders, wat bestaan uit 14 babas, 12 kleuters en 19 skoolgaande leerders. Huis Tekna bestaan al 22 jaar en word erken as ’n plek van veiligheid vir kinders wat uit hul ouerhuise geneem is weens verwaarlosing of mishandeling.
Volgens Tekna se bestuurspan het hulle in 2019 aansoek by die Nasionale Lotery gedoen om befondsing vir ’n nuwe voertuig te bekom en het hulle aanvaar die aansoek was nie suksesvol nie.
Die tehuis moes tydens die grendeltydperk baie aanpassings maak en op al hul uitgawes besnoei om steeds hul verpligtinge na te kom.
En net toe hulle amper moed verloor, daag Graeme Alberts, Toyota-agent, by Melenie Nel, Huis Tekna se projekbestuurder, se woning met die tehuis se splinternuwe 2020 Toyota Quantum 2.8 GL 11-sitplekminibus op.
Die bussie is van kleurvolle logo’s voorsien sodat inwoners dadelik dié spogvoertuig kan raaksien.
Alberts het gesê die minibus is toegerus met ’n 2,8 liter dieselenjin en het ’n sesspoed ratkas wat vir puik brandstofverbruik sorg. Die ruim binnekant van die kajuit het gerieflike leersitplekke en is voorsien van voldoende veiligheidsgordels. Die lugreëling is ook nie beperk tot die voorste sitplekke nie, maar sal vir elke passasier ’n welkome lafenis bied in die bloedige warm Bosveld-somers.
Vir beter sigbaarheid op die paaie is unieke ligte geïnstalleer wat outomaties aanskakel wanneer die voertuig aangeskakel word en dit funksioneer afsonderlik van die hoofligte.
Die voertuig beskik ook oor ’n WiFi-punt vir navigasie- en slimfoon-doeleindes.
Die minibus sal sonder twyfel rygenot vir die kinders en personeel verskaf.
Huis Tekna het die skenking met dankbaarheid verwelkom.
