Reservaat kry helpende hand terwyl bedryf bloei
Die toerismebedryf is een van dié wat die hardste deur die Covid-19-regulasies getref word.
Die regering het in die jongste Staatskoerant aangedui hy beoog om finansiële hulp aan dié sektor te verskaf. Die proses om aansoeke vir regeringshulp word as dringend beskou en die proses moet toeganklik wees vir die voortbestaan van verskeie diensverskaffers in die bedryf.
Die Groter Balepye-natuurreservaat buite Gravelotte in Limpopo het onlangs goeie nuus ontvang. Lede van African Wildlife Services (AWS) van Bela-Bela speel ’n aktiewe bestuursrol by dié reservaat.
Die reservaat het verneem dat hulle nou — bykans drie maande nadat hulle om regeringshulp aansoek gedoen het — ’n hulppakket van R50 000 sal ontvang.
Louis Ebersöhn, direkteur van AWS, het aan Die Pos gesê hulle is baie dankbaar vir dié druppel-aan-die-emmer-verligting, want die werknemers se salarisse en die voortbestaan van die reservaat is in die gedrang.
Die reservaat is ’n paar jaar gelede deur middel van ’n grondhervormingsproses gestig.
Daar is wild gevestig, geriewe opgegradeer en die deure is oopgegooi vir toeriste en professionele jagters. Die reservaat het geldelike bystand aan 532 huishoudings gebied en werkgeleenthede in die gemeenksap geskep danksy die aanleer van nuwe vaardighede in die wildbedryf.
“Hierdie was een van die suksesstories van die hele grondhervormingsproses. Ons staan die gemeenskap by met die bestuur van die reservaat, maar sedert die inperking het ons nie ’n enkele kliënt gehad nie. Daar was geen inkomste nie, maar die bedryfsuitgawes moes steeds betaal word.”
Ebersöhn het gesê kenners meen die toerismebedryf sal eers weer teen aanstaande jaar op sy voete kom. Die sluiting van die lugvaartbedryf het Balepye veral hard getref omdat hulle vanjaar geen buitelandse jagters kon ontvang en huisves nie. Dié verlies word op miljoene bereken. Ebersöhn het in sy aansoek aan die departement aangevoer dat die verlies van inkomste ’n direkte invloed op die plaaslike gemeenskap het, aangesien hulle van die reservaat afhanklik is.
“Ons praat nie eens van die stryd teen wildstropers nie, want daar is geen hulpbronne wat ons bystaan nie. Dit is in nasionale belang dat die toerismebedryf sy kop optel, want daardeur kan bewaring deur benutting, opleiding en programme soos die hervestiging van wild ook voortgaan.
- Ingevolge die Staatskoerant mag jagters slegs jagtogte binne provinsiale grense tydens vlak-3 van die grendelstaat onderneem. Die jagtogte mag slegs onderneem word indien die jagter en die plaaseienaar oor die nodige permitte beskik. Ingevolge wetgewing mag wild tans slegs vir verbruik geskiet word.
- Die jongste wetgewing bepaal dat slegs dagbesoekers weer by plekke van besienswaardigheid en natuurreservate toegelaat word. Gastehuise en hotelle mag slegs oornagverblyf verskaf aan mense wat op sakebesoek is. Hierdie diensverskaffers moet egter aan al die Covid-19-veiligheidsriglyne voldoen en moet ook deeglike rekordhouding hê van alle besoekers.
