Staatshospitale verbied ook besoektye
Die plasing van dié berig op Die Pos se Facebookblad is moontlik gemaak deur Waterberg Toyota.
Die departement van gesondheid het ook amptelik besluit om geen besoekers by staatshospitale toe te laat nie.
Dié besluit is reeds by die meeste privaat hospitale van toepassing.
Die departement het vandeesweek in ’n verklaring gesê daar daag steeds te veel besoekers tydens besoektyd op en dit hou ’n gevaar vir personeellede en pasiënte in. Vroeër is aangekondig dat besoekers hul geliefdes in staatshospitale vir ’n uur per dag kon besoek.
Derick Kganyago, woordvoerder van die departement, het aan Die Pos gesê geen staatshospitaal sal tot verdere kennisgewing besoekers toelaat nie. Mense word aangeraai om eerder die betrokke hospitaal te kontak om uit te vind hoe dit met hul geliefdes gaan.
Kganyago het gesê pasiënte in Limpopo wat positief vir Covid-19 getoets word, sal na die spesiale eenhede in Polokwane en Modimolle oorgeplaas word.
Intussen word pasiënte wat by staatshospitale opdaag by die hekke voorgekeer en geëvalueer. Kganyago het gesê hospitale is gerat om dié proses te hanteer.
Vooraftoetse bepaal of ’n pasiënt in die hospitaal toegelaat mag word en of pasiënte as ’n risikogeval hanteer moet word.
Hy het gesê pasiënte wat in rye wag om mediese sorg by staatshospitale te ontvang, moet ook veilige afstande handhaaf.
* Altesame 19 mense het reeds in Limpopo positief vir die virus getoets.
Baie dankie aan Waterberg Toyota sonder wie se hulp die plasing van dié aanlynberig nie moontlik sou wees nie.