Nuwe leraarspaar verwelkom
Die gemeente van die AGS Woord en Lewe Kerk in Bela-Bela het ’n nuwe leraar verwelkom en die vriendelike gesig van past. Johnathan Mouton behoort gou ’n bekende in die dorp te wees.
Past. Hugh Grahan, jare lange leraar van die gemeente, het op Sondag 23 Februarie sy uittreepreek gelewer. Mouton neem nou die leisels as herder van dié gemeente by Grahan oor.
Mouton en sy vrou, Naomi, was vir vyf jaar in die bediening betrokke. Die laaste gemeente waar hulle was, is die AGS Kerk in Balfour.
Mouton was voorheen ’n boer en ook in die motorbedryf betrokke en Naomi het ’n ingenieursonderneming bestuur. Hulle het drie kinders wat reeds volwasse is.
Die egpaar sien daarna uit om permanent in Bela-Bela te woon en te bedien.
“Ons moet nog uitpak en nesskrop, maar is klaar opgewonde oor die Here se plan vir ons hier in Bela-Bela. Ons glo hier gaan nog baie goeie dinge in hierdie dorp gebeur.”
Dit is vir hulle belangrik om die Evangelie aan die breër gemeenskap oor te dra en dit nie te beperk tot lidmate nie, want dit is nodig vir ’n gemeenskap om in siel, gees en liggaam versterk te word.
Mouton neem sy plek op die preekstoel op Sondag 1 Maart in. Alle inwoners is welkom by die erediens.
