Eredienste nou ook op weeksdae
Sondae is dikwels nie rusdae vir diegene wat in die gasvryheidsbedryf werk nie en geleentheid om ’n erediens by te woon is daar ook nie altyd nie.
Die NG-gemeentes Waterberg en Nylstroom-Oos in Modimolle het op Woensdag 5 Februarie hul eerste aftrekplek-erediens gehou — in die middel van die week — sodat diegene wat in die gasvryheidsbedryf werk, dit kan bywoon.
“Dit gee vir almal, maar veral vir mense wat in die gasvryheidsbedryf werk, die geleentheid om bewustelik in die teenwoordigheid van God te wees en om — soos die naam aandui — so ’n bietjie in die middel van die week af te trek, stil te word en op God te fokus,” het ds. Riaan Odendaal gesê.
“Almal is baie welkom, veral diegene wat in restaurante, lodges en gastehuise werk en nie altyd die geleentheid het om op ’n Sondag ’n erediens by te woon nie.”
Die aftrekplek-eredienste vind elke eerste en derde Woensdag van die maand om 18:00 in die kerkgebou van die NG-gemeente Waterberg plaas. Daar sal nie dienste gedurende skoolvakansies wees nie. Dit is ’n informele erediens in ’n meditatiewe styl.
Die volgende diens word op Woensdag 19 Februarie om 18:00 gehou. Die fokus sal val op die gebed van Jabes in 1 Kronieke 4:10.
Vir meer inligting, bel di. Riaan Odendaal by tel. 082 497 1891, Abraham Viviers by tel. 083 232 2445, Ewald Schmidt by tel. 082 579 6648 of Danie Ueckermann by tel. 082 579 6649.