Droogekloof-man dood gevind
“Die polisie het die man met ’n wond aan die linkerkant van sy keel aangetref. ’n Mes is by hom gevind, asook ’n brief.”
![](https://images.caxton.co.za/wp-content/uploads/sites/134/2020/01/liggaam-in-veld-pexels.jpg)
Die Bela-Bela-polisie is besig met ’n nadoodse ondersoek nadat ’n man op Saterdag 18 Januarie in die Droogekloof-gebied buite die dorp dood gevind is.
Sers. Frans Maponya, polisiewoordvoerder, het by navraag gesê die oorledene is geïdentifiseer as Mauritz Jacobus de Villiers (68).
“’n Inwoner het om 07:45 op ’n bakkie in ’n oop stuk veld (hoewe 81) afgekom met die oorledene agterop die bakkie,” het Maponya gesê.
“Die polisie het die man met ’n wond aan die linkerkant van sy keel aangetref. ’n Mes is by hom gevind, asook ’n brief.”
Maponya het gesê De Villiers se familie is kort ná die ontdekking van sy dood in kennis gestel. In die brief wat by hom gevind is, word melding gemaak van nóg ’n brief wat De Villiers in sy woning gelaat het.
Die ondersoek duur voort.
Pogings om De Villiers se familie vir kommentaar te bereik was teen druktyd onsuksesvol.