Magrietjies hou Kerssangdiens
Gewyde klanke van Kersliedere het op Woensdagaand 13 November uit die NG-kerk in Mookgophong se saal opgeklink.
Die Magrietjies, die onbaatsugtige groep wat kankerlyers versorg, het die Kerssangdiens aangebied.
Die geleentheid is deur Charl en Debbie Weideman gereël en Yvette van der Wahl het hulle met die sang bygestaan.
Elarda Wondergem het die besoekers namens die Magrietjies verwelkom, waarna die Euphorbia Christelike Onafhanklike Skool se slagorkes, onder leiding van Christo Stols, met Kersliedjies weggeval het. Die kleinspan het hulle ingeleef in hul vertoning en almal beïndruk met puik spel.
Die NG-kerkkoor en Nomsa Chaba, ’n gr. 8-leerder van Hoërskool Hans Strijdom, het ook opgetree en ’n rustige Kersatmosfeer met hul stemme geskep. Die Weidemans en Van der Wahl het saam met die gehoor gesing.
Die aand is afgesluit met die sing van die Oorwinningslied terwyl almal kerse vasgehou het wat ’n lieflike, sagte lig gegooi het.
Die Magrietjies wens almal ’n geseënde Kersfees toe en hopelik ’n nat en voorspoedige 2020.
Hulle het hul innige dank betuig aan die inwoners wat deur die jaar meegedoen het aan hul fondsinsamelings.