Boekwurms kan nie meer wag vir vakansie
Elke boekwurm weet dat ’n mens nie ’n Desembervakansie binnegaan sonder ’n hoë stapel boeke op die bedkassie nie.
Die Leeskring in Modimolle gee hul beste om voor te bly om ywerige lesers van nuwe leesstof te voorsien en het op Vrydag 22 November weer 20 nuwe boeke op hul rakke uitgepak. “Teen die Maandagoggend was die boeke reeds uit!” het Marthie Alberts van die Leeskring gesê. “Nuwe mense kom sluit nog gereeld by die Leeskring aan,” het sy gesê. Die rakke is steeds volgepak met boeke wat in elke leser se smaak sal val.
Die nuwe Afrikaanse boeke wat gekoop is, is Helene de Kock se Die kind uit die Wingerd, Helene Hugo se Papierblomme, Chris Karsten se Anderman se Vrou, Chanette Paul se Mirre, Madelein Rust se Doodsengel, Bets Smith se Dooiegety, Piet van Rooyen se By die Brandenberg, Marita van der Vyver se Grensgeval en Santie van der Merwe se ’n Goeie jaar vir Rose.
Diegene wat Engels lees, kan uitsien na Jeffrey Archer se Nothing Ventured, Tilly Bagshawe (Sidney Sheldon) se The Silent Widow, David Baldacci se Memory Man, Barbara Delinsky se Before and Again, John Grisham se The Reckoning, Stephen Leather se boek The Shout, Susan Lewis se One Minute Later, Jo Jo Moyes se The Giver of Stars, J.D. Robb se Connections in Death, Michaiel Robotham se The Other Wife en Karin Slaughter se Pieces of Her.
Lesers kan boeke op Maandae en Donderdae van 09:00 tot 12:00 en van 14:00 tot 17:00 uitneem. Die Leeskring is in Steve Tshwetestraat 13 in Modimolle.
Die Leeskring sluit op Donderdag 12 Desember en open weer op Maandag 6 Januarie.
Vir meer inligting, bel vir Alberts by tel. 082 441 9047 of tel. (014) 717 5080 of vir Elsie Koch by tel. 072 249 1205.