Boere kyk terug op mooi geskiedenis
Die Elders-boerevereniging in die Mookgophong-distrik het tydens hul 65ste bestaansjaarvieringe ’n blik na die verlede geneem.
Ockert Scherman het tydens die afsluitingsgeleentheid hoogte- en laagtepunte uit die eerste vergaderings se notules gelig.
“Die probleme waarmee die boere vandag worstel en die probleme van 65 jaar gelede is maar presies dieselfde,” het Scherman gesê.
Die gesellige geleentheid is op Vrydagaand 1 November by Die Olifant buite die dorp gehou. Scherman het in sy verwelkoming verwys na die groei van boerderybedrywighede sedert die stigting van die vereniging.
Die boerevereniging is op 28 April 1954 op die plaas Leeukuil gestig.
Die toestand van paaie en die droogte, net soos vandag, is destyds as knelpunte aangeteken. Scherman het nostalgies verwys na die padskraper wat darem die paaie gereeld geskraap het en in een notule word daar verwys na die probleem van roomkanne wat op die stasie verlore geraak het. In ander notules word daar ’n paar keer melding gemaak van die Elders-boerevereniging se betrokkenheid by die teer van die pad tussen Crecy en Roedtan.
Cal Gibson was die eerste voorsitter wat verkies is en die ledegeld het een pond per jaar beloop (ongeveer R2).
“Daar is in 1979 veral geskryf oor die baie veldbrande en dit is ook wanneer die Naboomspruit-brandvereniging ontstaan het,” het Scherman gesê.”
Die ledegeld is in 1980 na R25 per lid per jaar verhoog en ’n lid moes twee vergaderings bywoon anders het die betrokke lid sy lidmaatskap verloor. Scherman het Basie Jacobs as een van die beste voorsitters in die bestaan van Elders uitgesonder.
Die oudste lid van die boerevereniging, Nico Muller, wat in 1980 aangesluit het, het ook die geleentheid bygewoon. Scherman is sedert 1985 lid van die vereniging en is vanjaar al 24 jaar voorsitter.
Charl Heymans is as nuwe ondervoorsitter verwelkom. Scherman het ook vir Floris Booysen gelukgewens met sy verkiesing as nuwe voorsitter van die Potgietersrus-distriklandbou-unie.
