Spoggerige ete vir Mookgophong-bejaardes aangebied
’n Spoggerige ete word vir Saterdag 26 Oktober ten bate van die Naboom Tuiste vir Bejaardes in Mookgophong beplan.
Die ete beloof om ’n uithanggeleentheid te wees. Gaste sal vanaf 18:30 by die NG-kerksaal ontvang word.
Soos talle ander instansies benodig hierdie tehuis ook geld vir deeglike instandhouding en die goeie versorging van die bejaardes. Die gemeenskap het reeds ruim bygedra tot die geleentheid. In die woorde van Toeks Erasmus, een van die organiseerders: “Onse goeie mense gee graag.”
Sy het mense wat belangstel om die geleentheid by te woon genooi om kaartjies vir ’n sesgangete by die verskillende kerkkantore en ook by Die Tuiste se kantoor te koop. Kaartjies kan afgelewer word indien dit nie moontlik is om dit te gaan koop nie.
Volgens Erasmus sal baie van die organisasies in die dorp deelneem aan dié poging. Die Gereformeerde Kerk se vroue sorg vir die groente wat deur die boereverenigings geskenk is en Simon Prinsloo sal van sy heerlike wildsvleispasteie gaarmaak. Daar sal selfs ’n volstruisbredie op die spyskaart wees, asook ’n heerlike hoendergereg. Die voorgereg is tradisionele pap en kaiings.
Elizabeth Woodcock, ’n besoeker uit Engeland wat tans in die omgewing kuier, het aangebied om die slaaiborde voor te berei. “Ons het werklik groot waardering vir iemand met soveel inisiatief,” het Erasmus gesê.
Emsie Malan, wat in beheer is van Die Tuiste se kombuis, berei die biltongsop voor en Shangri-La maak die nagereg en kaasborde en skenk ook ’n nag verblyf as prys vir ’n gelukkige persoon. Die ete word afgesluit met port en sjokolade wat saam met koffie en tee deur leerders van Hoërskool Hans Strijdom bedien word.
Al die wyn en glase vir die geleentheid is deur Annemarie Potgieter geskenk en die kerk het die saal gratis beskikbaar gestel.
Anne-Marie Mailovich, wat binnekort na Engeland en Ierland vertrek om haar sangstudies daar voort te sit, sal as gaskunstenaar optree met bekende opera-arias.
Besprekings kan reeds gedoen word by tel. (014) 743 0685 of by die verskillende kerkkantore. Kaartjies kos R150 per persoon.