Jongboer van die jaar-finaliste bekend
Agt boere vanuit Limpopo, Gauteng en KwaZulu-Natal staan in September die kans om as die Transvaalse Landbou-unie van Suid-Afrika (TLU SA) se jongboer van die jaar aangewys te word.
Boere jonger as 35 jaar van regoor die land het vir die kompetisie ingeskryf.
Twee van die finaliste is met mekaar getroud en twee ander is broers.
Luidens ’n verklaring van TLU SA is die finale agt AJ Wohlfarht (34) van Gauteng, Azelle (29) en Neels (30) Uys van Heidelberg, George (29) en Stephan Cloete (28) van Ermelo, Lukas Eksteen (33) van Buffelsfontein in Mookgophong, Stephan Landman (33) van KwaZulu-Natal en Wynand Louw (28) van Nooitgedacht in Limpopo.
Die jong boere se kundigheid strek wyd en elkeen het ’n spesialiteitsveld. Wohlfarht boer met pluimvee. Die Cloete-broers boer met skape, mielies en sojabone. Die Uys-egpaar het elk hul eie boerdery met Azelle wat met beeste en skape boer terwyl Neels ’n voltydse saaiboerdery het. Landman het ’n algemene boerdery met skape, beeste, sojabone en die aanplant van mielies.
Die kandidate vanuit Limpopo is albei beesboere by uitstek. Louw boer met boran-beeste en macadamianeute en Eksteen spesialiseer in Bonsmaras.
TLU SA se beoordelaars het einde Junie reeds die finaliste besoek om insae in hul lewens en boerderybedrywighede te kry as deel van die beoordelingsproses.
Die publiek kan vanjaar ook vir hul drie gunstelingboere stem wat sal bydra tot die beoordelaars se finale besluit.
Bennie van Zyl, TLU SA-president, het gesê die doelgerigtheid, toekomsvisie en algemene bestuursvernuf van die finaliste is vir die organisasie ’n riem onder die hart, veral in die onsekere tyd waarin landbou homself tans bevind.
Die top drie boere sal tydens die TLU SA-kongres op Woensdag 18 September bekendgemaak word.
Die publiek kan direk op TLU SA se webblad vir hul gunstelingboer stem of deur die deelnemers se naam te SMS na tel. 34855.