Verkeer ontwrig ná ongeluk op N1, mense dood
Sommige van dié voertuie is tydens die ongeluk van die vragmotor afgeslinger en beskadig.
Die verkeer in Bela-Bela is vanoggend erg ontwrig nadat ’n groot ongeluk op die N1-snelweg tussen die Bela-Bela/Settlers-afrit en die Kranskop-tolhek plaasgevind het en ’n gedeelte van die snelweg gesluit moes word.
Die verkeer word vanaf die snelweg deur Bela-Bela en daarna op die R101-pad herlei.
Voertuie het vroegoggend vanaf die snelweg tot by die Waterfront opgehoop.
Volgens Matome Moremi, provinsiale verkeerswoordvoerder, was twee swaarvoertuie in die ongeluk betrokke.
Een van die vragmotors het 10 ander voertuie vervoer.
Sommige van dié voertuie is tydens die ongeluk van die vragmotor afgeslinger en beskadig.
Na wat verneem word is twee mense dood en sewe ander beseer.
Die ongelukstoneel op die snelweg word volgens Bela-Bela-munisipaliteit se woordvoerder, Kabelo Mosito, opgeruim en kan tot 13:00 vandag duur.
Hy het ’n beroep op motorrryers gedoen om geduldig te wees met die druk verkeerstoestande.