Ingevolge dié inperking is alle strande, openbare samekomste en drankverkope opgeskort.
’n Nuwe aandklokreël is ook ingestel. Die Waterberg is as hoërisikogebied verklaar en lede van die Suid-Afrikaanse weermag is in Bela-Bela ontplooi om die polisie by te staan.
Sers. Frans Maponya, polisiewoordvoerder, het aan Die Pos gesê daar is op Saterdag 9 Januarie altesame 36 mense in die omgewing in hegtenis geneem tydens ’n gesamentlike operasie tussen die polisie en weermag.
Volgens provinsiale polisiesyfers is daar sedert Sondag 3 Januarie altesame 1 163 mense in Limpopo in hegtenis geneem.
In Bela-Bela is mense aangekla van onder meer dronkbestuur, drink in die openbaar en die verontagsaming van die aandklokreël, het Maponya gesê.
Van dié beskuldigdes is boetes opgelê en ander moet eersdaags in die hof verskyn. * ’n Rooftog het op Vrydag 25 Desember by Liquor City in Potgieterstraat in die dorp plaasgevind waartydens ’n man geskiet is, het Maponya gesê.
Die Liquor City-personeel was op dié dag besig om aan die agterkant van die perseel drank in grootmaat te verkoop. Volgens ’n ingeligte bron in die polisie het die onderneming oor die nodige magtiging beskik om die drank aan diensverskaffers te verkoop, maar nie aan individue nie.
Volgens Maponya het vier gewapende rowers die perseel betree, die personeel aangehou en op kontant aangedring. ’n Sakeman van Modimolle, Fielimon Ntsendwana (49), is tydens die rooftog raakgeskiet toe hy op pad was na sy voertuig, het Maponya gesê.
Die vier rowers het R30 000 kontant gebuit en op die vlug geslaan. Dit is nog onduidelik of hulle te voet of in ’n voertuig gevlug het, het Maponya gesê.
Ntsendwana is deur omstanders na die Warmbad-hospitaal gehaas. ’n Ambulans het hom in Chris Hanistraat ingewag, maar hy is met sy aankoms dood verklaar. Die polisie ondersoek reeds ’n saak van moord en roof. Die verdagtes is nog op vrye voet.
- Die Pienaarsrivier-polisie het op Sondag 10 Januarie naby die Maubane-afrit in die Pienaarsrivier-omgewing op die uitgebrande lyk van ’n man afgekom.
Volgens lt. kol. Mamphaswa Seabi, polisiewoordvoerder, is die oorledene vermoedelik vermoor en sy liggaam in ’n sloot langs die R101-pad gegooi.
Die lyk is die Sondagmiddag deur ’n veewagter ontdek. Volgens Maponya is daar tekens dat die lyk langs die pad aan die brand gesteek is, maar dit is onbevestig.
Die moontlikheid dat die slagoffer dalk elders vermoor is, word ook ondersoek.
Die slagoffer kon teen druktyd nie geïdentifiseer word nie. Die polisie vra die publiek se hulp om met inligting na vore te kom rakende die voorval.
Mense kan die ondersoekbeampte bel by tel. 082 403 4035 of hul naaste polisiestasie skakel.
