Die dier is op ’n plaas in die Dorset-omgewing, tussen Vaalwater en Lephalale, geskiet.
’n Plaaswerker wat patrolliewerk gedoen het, het op die karkas afgekom. Die horing was reeds verwyder.
Volgens kol. Moatshe Ngoepe, provinsiale woordvoerder van die polisie, is dit nie bekend wie die verdagtes is nie.
Die polisie vra enigeen met inligting wat kan lei tot die inhegtenisneming van die skuldiges, om die ondersoekbeampte te skakel by tel. 082 414 2337.
Hulle kan ook hul naaste polisiestasie nader. Barbara Creecy, minister van omgewingsake, bosbou en visserye, het in Augustus gesê daar was in die eerste ses maande van die jaar ’n afname in die getal renosters wat gestroop is.
Dit kan deels toegeskryf word aan die Covid-19-maatreëls wat vrylike beweging beperk en dus ook verskaffingsnetwerke van stropers omver gegooi het.
Parke was ook gedurende dié tyd vir die publiek gesluit.
Volgens Creecy is daar 166 renosters in dié tyd gestroop, in vergelyking met 316 in dieselfde tyd verlede jaar.
Renosterstropery sal na verwagting toeneem namate die land se grense weer oop is. Daar is in 2019 landwyd altesame 594 renosters gestroop en in 2018 was die syfer 769, het Creecy gesê.
Die diere se horings is hoog in aanvraag in lande soos China en Viëtnam waar dit in poeiervorm verkoop word as ’n kuur vir verskeie kwale, hoewel daar volgens kenners geen bewyse is dat dit medisinale voordele inhou nie.
