![](https://images.caxton.co.za/wp-content/uploads/sites/134/2020/04/arrested-freepik.jpg)
Die Modimolle-polisie het Muhammed Ismail Essack (46), wat in 2015 saam met sy pa, Ishmael, op klagtes van bedrog aangekeer is, is op Sondag 15 November by ’n huis in Makapanstad in Gauteng in hegtenis geneem nadat die polisie inligting ontvang het oor waar hy hom bevind.
Essack word tans met 26 sake verbind en die klagtes wissel van bedrog en korrupsie tot diefstal.
Dié sake spruit uit klagtes wat die polisie ontvang het van kliënte van die Montoya-motorhandelaar in die dorp.
Volgens kol. Moatshe Ngoepe, provinsiale woordvoerder van die polisie, het een van die klaers sy motor in Maart 2014 ingeruil op ’n groter voertuig.
Volgens die kontrak sou die handelaar die uitstaande bedrag by die bank aflos, maar dit is nooit gedoen nie.
Die klaer moes noodgedwonge die paaiemente op twee voertuie betaal. Nadat nog klagtes teen die motorhandelaars gelê is, het finansiële instellings op 19 voertuie beslag gelê.
Van die klaers het gesê dat hulle nooit die voertuie, waarvoor hulle reeds betaal het, ontvang het nie.
Daar was nóg klagtes van voertuie wat ingeruil is, maar nooit by die banke afgelos is nie en die klaers moes aanhou betaal.
Essack verskyn weer op Dinsdag 24 November in die hof in Modimolle om aansoek te doen om borgtog.