![](https://images.caxton.co.za/wp-content/uploads/sites/134/2020/10/3a-4-780x470.jpg)
Surett Grobler en Johann van Baalen is op Donderdagnag 22 Oktober deur twee rowers oorval terwyl hulle geslaap het.
Die paartjie woon op die Koro Creek-gholflandgoed buite Modimolle.
ADVERTENSIE/ADVERTISEMENT
“Ons het altyd veilig gevoel omdat hier so baie veiligheidsmaatreëls is. Ons sluit gewoonlik ons kamerdeur, maar die mans was eers onder in die huis en het toe op ons balkon geklim om in die kamer te kom,” het sy gesê.
Die voorval het net ná 02:00 gebeur.
“Die mans het aan weerskante van die bed gestaan en Johann het my wakker gemaak. Hulle het flitsligte in ons oë geskyn sodat ons hulle nie kon sien nie. Die rowers het onmiddellik vir ons gesê ‘sleep! sleep!’ en ons met ’n kombers toegemaak. Daardie kombers het soos genade gevoel wat ons veilig hou. Ek het net gehoor hoe Johann bid. Daar het so ’n vreemde kalmte oor my gesak toe ek besef wat gebeur.”
Die twee se hande en voete is agter hul rûe met skoenveters, selfoonlaaiers en ’n haardroër se kabel vasgebind. Die rowers het Van Baalen met ’n wapen geslaan.
“Hulle het die kluis se sleutel gekry en wapens, juwele en kontant gevat. Hulle het selfs onder die kussings en matras gesoek,” het Grobler gesê.
Hulle het daarna die kamerdeur gesluit en is vort. Die paartjie is nie ernstig beseer nie. Grobler het besef dat haar hande en voete met een van Van Baalen se gordels aanmekaar vasgebind is. Nadat sy haarself en Van Baalen losgewikkel het, het hulle na die landgoed se veiligheidshek gery.
“As ons nie kon loskom nie, sou ons so bly lê het totdat iemand ons kom soek het.”
Die polisie en die landgoed se veiligheidsmaatskappy was binne enkele minute op die toneel, het sy gesê. AO James Findlay, woordvoerder van die Modimolle-polisie, het die voorval bevestig. ’n Klag van huisroof word ondersoek.
Baie dankie aan Bosveld Glas sonder wie se hulp die plasing van dié aanlynberig nie moontlik sou wees nie.