Die inwoner, wat verkies om anoniem te bly, vermoed sy besonderhede is bekom nadat hy op ’n webtuiste waar mense na lewensmaats soek, ingeteken het.
Hy het in ’n aanlyngesprek met ’n vrou betrokke geraak wat op sy navrae gereageer het. In hul gemaklike geselsies het sy persoonlike inligting van hom bekom.
’n Week later het die sogenaamde polisiebeampte hom gebel en die inwoner ingelig dat die vrou met wie hy gesels het kamtig ’n saak teen hom geopen het.
Volgens die beampte was dit ’n ernstige klag wat verband hou met geweld teen vroue en kinders. Die geskokte inwoner het dadelik ontken dat hy enige kontak, behalwe dié in die kuberruim, met die vrou gehad het.
Die “beampte” het hom daarna aangeraai om liefs ’n “skikkingsooreenkoms” aan te gaan en op dié manier ’n uitgerekte hofsaak te vermy. Dit sou egter duisende rande kos om die “aanklag” te laat “verdwyn”, het hy aangevoer.
Die inwoner het sy familie van die situasie ingelig en die polisie se teenkorrupsie-eenheid in Polokwane is om hulp genader. Sover vasgestel kon word, is geen klag teen die inwoner gelê nie en was hy byna die slagoffer van ’n internetswendelaar.
Die inwoner waarsku internetgebruikers om uiters versigtig te wees wanneer hulle die internet gebruik en om eerder riskante webtuistes te vermy. Hy het die vertroue uitgespreek dat die korrupsie-eenheid die swendelaar sal vastrek.
- Volgens inligting van die Bela-Bela-polisie sal geen polisiebeampte ’n persoon kontak en op omkoopgeld aandring om ’n aanklagte te laat “verdwyn” nie.
Sulke aanklagte van afpersing en omkopery word in ’n baie ernstige lig beskou en word deur die inspektoraat vir prioriteitsmisdade (die Valke) ondersoek.
’n Skulderkenningsboete kan wel by ’n polisiestasie betaal word vir minder ernstige misdrywe, maar die persoon sal steeds ’n rekord hê.
