![](https://images.caxton.co.za/wp-content/uploads/sites/134/2020/10/dwelmsmous-freepik.jpg)
Volgens ’n polisiewoordvoerder het die man, wat ’n Tata-bakkie bestuur het, op Sondag 18 Oktober teen ’n trok op die snelweg gebots.
Die ongeluk het teen ongeveer 06:30 sowat 5 km van die Palm Plaza Caltex-vulstasie by die Settlers/ Bela-Bela-afrit plaasgevind.
Volgens die polisie het die man aanvanklik geweier om vir mediese behandeling na die hospitaal geneem te word en wou hy nie sy voertuig agterlaat nie.
Een van die beamptes, konst. Pieter Scheepers, het snuf in die neus gekry toe die man na die voorkant van die beskadigde voertuig gestap het en met die ligeenheid gepeuter het. Die man het toe ’n pakkie agter die voorste koplig uitgehaal, wat klaarblyklik dwelms bevat het.
Die waarde van die dwelms word op sowat R3 000 geraam. Die verdagte is op die toneel in hegtenis geneem en aangekla van die besit van dwelmmiddels.
Die woordvoerder het voorts gesê die man is onder polisiebewaking in ’n plaaslike hospitaal opgeneem vir behandeling.
Die verdagte sou teen druktyd ontslaan word en sou na verwagting op aanklag van die besit van dwelms in die Bela-Bela-landdroshof verskyn het.
Die man was glo onderweg na Mokopane toe die ongeluk plaasgevind het. Die ondersoek duur voort.