Volgens AO James Findlay, woordvoerder van die Modimolle-polisie, was daar die afgelope maand ’n vlaag motordiefstalle, of gevalle waar daar aan voertuie gepeuter is, in die Eersbewoond- en R101-omgewing tussen Modimolle en Bela-Bela.
Lede van die Modimolle-speurtak, visuele polisiëringseenheid, misdaadintelligensie en gemeenskapspolisiëringsforum (GPF) het saam met lede van Bela-Bela se landelike veiligheid en visuele polisiëringseenheid en TrackerSA gewerk om die net al stywer om die verdagtes te span.
Volgens Findlay het AO Ross Rossouw van die Modimolle-speurtak ondersoek ingestel en ’n verdagte wit Volkswagen GTI Golf se bewegings is uitgewys.
Die voertuig is op Woensdag 23 September om 05:30 naby die Carousel-tolplaza opgemerk en die bestuurder is van die pad getrek.
“Vier mans is in hegtenis geneem. Temik-gif, asook kabelbinders, is in die voertuig gevind. Twee van die mans is Mosambiekse burgers en die ander twee se dokumente dui aan dat hulle Suid-Afrikaners is. Die egtheid van die dokumente sal nagegaan word,” het Findlay gesê.
Temik is ’n dodelike gif vir mens en dier en word dikwels gebruik om waghonde mee te vergiftig. Volgens Findlay word die vier mans ook verbind met sake in die Vrystaat.
