Die polisie en veiligheidsgroepe was etlike dae reeds op die uitkyk vir die mans, toe ’n wit Chevrolet-bakkie net buite die dorp opgemerk is, het Ben Engelbrecht van die Heritage Protection Group (HPG) gesê.
Die drie mans is aangekeer en ’n .375-jaggeweer met ’n aantal rondtes ammunisie, ’n knaldemper en ’n mes is in die voertuig gevind.
Die polisie se eenheid vir bedreigde spesies, asook die plaaslike polisie, HPG, Sanparke en privaat veiligheidsgroepe was by die operasie betrokke.
Die mans, wat volgens Engelbrecht Mosambiekse burgers is, se ouderdomme wissel tussen 25 en 45.
“Ons soek al lank na een van die verdagtes weens verskeie ander aanklagte van renosterstropery,” het hy gesê.
Twee van die mans sal eersdaags in die hof in Modimolle verskyn op aanklagte van sameswering om ’n misdaad te pleeg (renosterstropery) en die besit van ’n ongelisensieerde vuurwapen en ammunisie.
Die derde man sal in die hof in Thabazimbi verskyn op aanklag van renosterstropery. Lt. genl. Nneke Ledwaba, provinsiale polisiekommissaris, het die inhegtenisneming verwelkom en inwoners wat inligting verskaf het, bedank.
Inligting soos dié lei dikwels tot suksesvolle optredes en dan kan stropers vervolg word, het hy gesê.
