![](https://images.caxton.co.za/wp-content/uploads/sites/134/2020/09/4b-780x470.jpg)
Daar het die afgelope week twee ernstige motorongelukke op die N1-snelweg in die Bela-Bela-omgewing plaasgevind.
Drie mense is in die onderskeie ongelukke dood.
Volgens sers. Frans Maponya, Bela-Bela-polisiewoordvoerder, het die eerste ongeluk op Saterdag 12 September om 22:10 op die snelweg naby die Codrington-afrit plaasgevind toe die bestuurder van ’n Volkswagen Polo beheer oor die voertuig verloor en dit omgeslaan het.
Die bestuurder is op die toneel oorlede. Sy is geïdentifiseer as Violet Mabela van Hammanskraal. Die presiese oorsaak van die ongeluk word nog ondersoek, het Maponya gesê.
Nog ’n ongeluk het op Maandag 14 September om 14:30 naby die Settlers-afrit op die snelweg plaasgevind toe die bestuurder van ’n Toyota Hilux-bakkie ook beheer oor die voertuig verloor en dit omgeslaan het, het Maponya gesê. Daar was drie insittendes in die voertuig.
Moses Sambo, een van die passasiers, is op die toneel dood verklaar. Die tweede passasier, Victoria Khosa, is in ’n plaaslike hospitaal opgeneem, maar het later aan haar beserings gesterf, het Maponya gesê. Die bestuurder is ongedeerd. Die insittendes kom almal van Johannesburg.
Die polisie ondersoek twee afsonderlike sake van strafbare manslag.