’n Groep boere van die Roedtan- en Crecy-omgewing het op Dinsdag 8 September uit radeloosheid oor die skade wat hulle aan die hand van veediewe ly, protes aangeteken tydens die hofverskyning van veediewe in Mokopane.
Drie mans het op dié dag in die hof verskyn nadat hulle glo beeste in Crecy gesteel het.
ADVERTENSIE / ADVERTISEMENT
Volgens Floris Booysen, voorsitter van die Potgietersrus-DLU, ly boere duisende rande skade en het hulle daarom besluit om hul teenkanting teen die toestaan van borgtog te toon.
Die saak is uitgestel tot Dinsdag 15 September en geen borgtog is toegestaan nie.
Veediewe het boonop op Vrydagaand 11 September ’n boer in die Mookgophong-omgewing groot skade berokken toe hulle 27 skape gesteel het.
Volgens AO Hardus Els van die Modimolle-polisie se veediefstaleenheid het die diewe die skape op ’n bakkie en sleepwaentjie gelaai. Die skape is dorper/meatmasterkruisings en van hulle is gewone wit en swart dorpers, terwyl ander bruin van kleur is. Hulle is met geel oorplaatjies gemerk maar nie gebrandmerk nie.
“Boere moet nou paraat wees en verseker hul vee is veilig. Wanneer vee op die korrekte manier gemerk is, is dit makliker om hulle op te spoor,” het hy gesê.
Die diewe is steeds op vrye voet. Volgens Els word beeste wat in die Modimolle-omgewing gesteel word, dikwels na Northam of Polokwane geneem om daar verkoop te word,” het hy gesê.
Altesame 12 vermeende veediewe is in Augustus in hegtenis geneem vir die diefstal van 21 beeste in die omgewing.
Baie dankie aan André Kock en Seun sonder wie se hulp die plasing van dié aanlynberig nie moontlik sou wees nie.
