Kol. Moatshe Ngoepe, provinsiale polisiewoordvoerder, het in ’n verklaring gesê die polisie het teen ongeveer 05:45 ’n padblokkade gehou waartydens die beamptes ’n Ford Ranger-bakkie wat sewe beeste agterop ’n sleepwa vervoer het, van die pad getrek het.
Daar was vyf verdagtes in die voertuig. Die beamptes het die insittendes uitgevra oor eienaarskap en die herkoms van die beeste.
Die beamptes het gevra om die nodige permitte vir die vervoer van die beeste te sien.
By gebrek aan die dokumente is ondersoek ingestel en is die bestuurder van die voertuig en die passasiers in hegtenis geneem, het Ngoepe gesê. Sers. Frans Maponya, Bela-Bela-polisiewoordvoerder, het gesê die polisie het ná verdere ondersoek dieselfde dag nog twee verdagtes in Mokopane aangekeer en verbind met die groep in Bela-Bela.
Ngoepe het gesê die polisie vermoed tans dat die mans deel is van ’n sindikaat wat die afgelope tyd vee in die Polokwane-, Zebediela-, Mookgophong- en Mahwelereng-omgewing gesteel het.
Die verdagtes, Frank Kutumela (30), Thabo Mboyane (35), Peter Mboyane (28), Timothy Monamane (32), Mashudu Netshirembe (35), Jan Lekalakala (32) en Abel Maboa (56) het op Maandag 31 Augustus hul eerste verskyning in die Bela-Bela-landdroshof gemaak.
Hulle is aangekla van die besit van gesteelde vee.
Die saak is uitgestel tot Maandag 7 September vir verdere ondersoek. Vee-eienaars wat onlangs deurgeloop het onder veediefstalle kan die polisiestasie in Bela-Bela skakel by tel. (014)736 9760/9761 of by tel. 079 889 6514 en help om die beeste uit te ken.