Inwoners van die Bela-Bela-omgewing is die afgelope paar weke van noodsaaklike munisipale dienste ontneem toe booswigte infrastruktuur beskadig en toerusting gesteel het.
Volgens ’n betroubare bron is daar sedert die begin van Augustus drie transformators gesteel of beskadig en is koperkabels ook in die omgewing gesteel.
Dit het daartoe gelei dat inwoners vir dae sonder elektrisiteit was. ’n Gesin op die Alma-pad buite Bela-Bela het die eerste naweek in Augustus deurgeloop nadat ’n transformator op hul eiendom gesteel is. Die gesin was 13 dae sonder krag.
Die vrou, wat anoniem wou bly, het aan Die Pos gesê hulle het ’n klag by die polisie gelê.
Hulle voel egter nou onveilig, want die veiligheidstelsel werk met elektrisiteit. Hulle het ook duisende rande se verlies gely weens vrieskaste wat ontdooi het.
“Ons het uit desperaatheid ’n gasstoof gekoop. Ons kon nie ordentlik bad nie en ons kinders kon nie tuiswerk doen nie. Elke keer dat ons die munisipaliteit se kliëntedienssentrum geskakel het, was die persoon aan die ander kant van die lyn uiters ongeskik.”
Tinus Ras, DA-raadslid van wyk 1, het by navraag gesê die munisipaliteit het reeds ’n nuwe transformator bestel.
Die fout is ná twee weke herstel. By die Vogelstruispan- en Fish Eagle Bay-omgewing is ook voorvalle van transformatordiefstal aangemeld. Die skade aan toerusting beloop meer as R30 000. Volgens ’n polisiewoordvoerder wil dit voorkom asof die diewe kennis dra van hoëvolt-kragkabels.
Dit verg spesialiskennis om aan hierdie kabels te werk sonder die gevaar om doodgeskok te word. Die polisie ondersoek drie afsonderlike klagtes van toerusting- en kabeldiefstal.
Talle mense het aan Die Pos beweer dat die booswigte in al die gevalle in die rigting van die Koppewaai-nedersetting gevlug het en dat eiendomme op die Alma-pad geteiken word.
Die polisie wou nie op dié bewerings kommentaar lewer nie. Die polisie moedig die gemeenskap aan om alle diefstalgevalle aan te meld.
