Twee vermeende sigaretsmokkelaars het ’n onwelkome ontvangs by ’n padblokkade naby die Kranskop-tolhek gekry toe lede van die Modimolle-polisie hulle ingewag het.
Volgens AO James Findlay, woordvoerder van die Modimolle-polisie, het die polisie inligting van hul intelligensie-eenheid ontvang dat daar ’n verdagte voertuig tussen Vaalwater en Mookgophong beweeg wat vermoedelik sigarette smokkel.
Polisiebeamptes wat by die blokkade diens gedoen het, het die voertuig herken en die bestuurder van die pad getrek.
Die voertuig was gelaai met 750 kartonne sigarette. Volgens brig. Motlafela Mojapelo, provinsiale woordvoerder, het die polisie verskeie suksesse bereik met padblokkades en ander optredes wat vanaf 2‑9 Augustus gehou is. Hy het gesê 1 419 mense is regoor die provinsie in hegtenis geneem.
Dit sluit die inhegtenisname van die vierde verdagte in die gruwelike aanval op ’n egpaar van Soekmekaar in. Voorts is ’n 46-jarige man in Mokopane aangekeer vir die besit van vermoedelik gesteelde eiendom en 30 voertuigbande wat in Maart by ’n onderneming in die dorp gesteel is. Die polisie het ook misdadigers wat reeds geruime tyd gesoek word, opgespoor.
Winkelsentrums is ook gereeld besoek om te verseker dat die publiek by die Covid-19-regulasies hou. Die weermag, asook verskeie verkeersdepartemente, was hierby betrokke.
Die polisie het tydens dié optredes beslag gelê op wapens en ammunisie, voertuie, messe, plasmatelevisies, skootrekenaars, boutoerusting, meubels, selfone, drank en renosterkarkasse ter waarde van R146 464 000. Daar is beslag gelê op meer as R500 000 se onwettige sigarette en dwelms.
