![](https://images.caxton.co.za/wp-content/uploads/sites/134/2020/06/tronk-toe-freepik.jpg)
Venter is op 14 November 2015 dood in sy huis aangetref nadat sy vriendin wat by hom gewoon het, Mona Oosthuizen (46), alarm gemaak het. Hy was vasgebind en toegerol in ’n mat. Die hof het bevind dat hy weens versmoring dood is.
Ses mense, insluitend Oosthuizen en haar jong volwasse seun, Christoff Joubert, is aanvanklik aangekla van moord. Johan du Toit, wat voorheen op die plaas gewerk het, het ’n staatsgetuie geword.
Tydens die hofgebeure het ’n verhaal ontvou van mense wat, nadat Venter nie geld aan hulle wou leen nie, ’n plan beraam het om geld uit sy kluis te steel. Oosthuizen, Joubert, Louisa Ricco en Du Toit het die hulp van Ruben Miles en JP Johannesse ingeroep, maar die diefstal het nie volgens plan verloop nie, met tragiese gevolge.
Miles en Johannesse, wat kort ná die aanval in die omgewing in hegtenis geneem is, is deur landdros Pieter Manthatha tot 15 jaar tronkstraf elk gevonnis op die moordklag en drie jaar vir sameswering om diefstal te pleeg. Op die klag van roof met verswarende omstandighede is Miles tot 15 jaar tronkstraf gevonnis en Johannesse tot 25 jaar. Die vonnisse sal gelyklopend uitgedien word. Dit beteken dat Miles effektief 20 jaar tronkstraf sal uitdien en Johannesse 30 jaar.
Op ’n klag van sameswering om diefstal te pleeg is Oosthuizen tot drie jaar tronkstraf gevonnis wat vir vyf jaar opgeskort is op voorwaarde dat sy nie weer skuldig bevind word aan ’n oortreding nie.
Joubert is ’n boete van R6 000 opgelê of ’n vonnis van drie jaar tronkstraf wat vir vyf jaar opgeskort is. Ricco se drie jaar tronkstraf vonnis is ook vir vyf jaar opgeskort.