![](https://images.caxton.co.za/wp-content/uploads/sites/134/2020/04/diefstal1.jpg)
Boosdoeners het die inperkingstyd as ’n gulde geleentheid gesien om misdaad in die Bela-Bela-gebied te pleeg.
Die Poskantoor op die dorp, asook die winkeltjie langsaan en verskeie ander eiendomme in dié omgewing, is sedert die inperking geteiken.
Volgens kol. Abel Phetla, polisiebevelvoerder, het die polisie ses vermeende diewe in hegtenis geneem en ’n groot verskeidenheid vermoedelik gesteelde items teruggevind.
ADVERTENSIE / ADVERTISEMENT
Sover vasgestel kan word is die items gesteel by eiendomme in die township, die karwas-onderneming by die Bosveld Mall, plekke in die industriële gebied, asook by wonings in die dorp.
Die verdagtes sal in die Bela-Bela-landdroshof verskyn op aanklagte van huisbraak, diefstal en die besit van gesteelde eiendom.
Phetla het gesê meer inhegtenisnames word binnekort verwag.
Hy doen ’n beroep op mense by wie daar ingebreek is om die polisiestasie te besoek om hul eiendom te gaan uitken.
Baie dankie aan Banners & Flags sonder wie se hulp die plasing van dié aanlynberig nie moontlik sou wees nie.