Die polisie in Bela-Bela het reeds verskeie mense aangekeer wat die nasionale inperkingsbevel verontagsaam.
Suid-Afrikaners is vandag (Donderdag 2 April) reeds sewe dae lank tot hul wonings beperk om die verspreiding van die gevreesde koronavirus te probeer hokslaan. Die inperkingstyd kom na verwagting op Donderdag 17 April tot ’n einde.
Kol. Abel Phetla, bevelvoerder van die Bela-Bela-polisie, het by navraag aan Die Pos gesê daar is reeds 84 mense in Bela-Bela aangekeer wat die inperkingsreëls oortree het.
Die meeste van hulle is in die strate aangekeer. Hulle was nie op pad om kos te gaan koop of mediese hulp te kry nie, het hy gesê.
ADVERTENSIE / ADVERTISEMENT
Die 84 mense is elk met ’n boete van R500 gestraf en is vrygelaat.
Die polisie het Maandag en Dinsdag (30-31 Maart) padblokkades op verskeie plekke in die dorp gehou en streng toesig gehou oor inwoners wat hul regeringstoelaes by banke en kettingwinkels ontvang het.
Die departement van verkeer het vergunning gegee dat taxibestuurders se werkure op sekere tye van die maand verleng mag word, maar die aantal passasiers in elke taxi moet streng beheer word, het Phetla gesê.
“Die polisiebeamptes handhaaf veilige protokol. Wanneer beamptes soggens vir diens aanmeld, word hulle van maskers en handskoene voorsien. Die situasie is tot dusver onder beheer in Bela-Bela,” het Phetla gesê.
Baie dankie aan Thaba Kwena krokodilplaas sonder wie se hulp die plasing van dié aanlynberig nie moontlik sou wees nie.