AO Ross Rossouw en sers. Amanda Rossouw het Stefan Muller (32) in Shelly Beach, KwaZulu-Natal, in hegtenis geneem nadat hy op die vlug was.
Die Pos het verlede week berig Muller het glo lusern aan ’n vrou verkoop, maar verdwyn nadat sy die deposito van R42 000 betaal het. Sy het haarself tot sosiale media gewend en mense het van oraloor inligting gedeel oor waar hy hom bevind.
Die Modimolle-polisie was op Muller se spoor vir verskeie bedrogklagtes wat tussen 2011 en 2019 plaasgevind het, het AO James Findlay, polisiewoordvoerder, gesê. Volgens die polisie het Muller glo saam met sy meisie en hul drie kinders in Shelly Beach weggekruip. Hy het sy meisie se Nissan Navara-bakkie verkoop en ’n wit BMW aangeskaf om die polisie te mislei. Dit was egter nie suksesvol nie en die twee speurders het hom uitgesnuffel.
Hy het reeds in die hof in Modimolle verskyn. Sy saak is uitgestel tot Donderdag 26 Maart.
