Sers. Frans Maponya, polisiewoordvoerder, het gesê twee verdagtes is op Donderdag 20 Februarie in die Rotterdam-nedersetting, oos van Giyani, aangekeer. Hulle word verbind met die diefstal van ’n Nissan NP 200-bakkie wat in Januarie in Bela-Bela gesteel is. Die voertuig is teruggevind.
Die verdagtes — Thomas Makhubela (33) en Simon Makgatho (42) — het op Maandag 24 Februarie in die Bela-Bela-landdroshof op aanklag van die besit van ’n gesteelde voertuig verskyn. Hulle saak is uitgestel na Vrydag 28 Februarie.
’n Bela-Bela-inwoner van Ethiopiese herkoms is ook op Woensdag 19 Februarie in die Bela-Bela-township aangekeer. Maponya het gesê die verdagte, Dilebo Anbiko (31), het vermoedelik ’n onwettige vuurwapen op ’n erf begrawe voordat hy teruggekeer het na sy woning. Die polisie het ’n wenk uit die gemeenskap gekry en by ondersoek het hulle die wapen onder die grond gevind. Verdere leidrade het tot Anbiko se inhegtenisname gelei.
Maponya het gesê dit is tans onduidelik waarom Anbiko die wapen in ’n ander erf probeer versteek het.
Anbiko het reeds op aanklag van die besit van ’n onwettige vuurwapen in die hof verskyn. Hy verskyn weer op Dinsdag 3 Maart. Al drie verdagtes is in aanhouding.
