Die bestuurder, wat in ’n werksvoertuig gery het, het ongedeerd van die ongelukstoneel in die Bela-Bela-township weggestap.
Die munisipaliteit se tegnici het kort ná die ongeluk aan die werk gespring en gespook om die kragtoevoer te herstel. Teen skemer was die herstelwerk voltooi en kon inwoners in verskeie wyke van die munisipale gebied se kragtoevoer aangeskakel word.
Dié ongeluk het inwoners tot so lank as vyf bykomende ure sonder elektrisiteit gelaat.
Sers. Frans Maponya, polisiewoordvoerder, het aan Die Pos gesê daar is ’n ongeluksverslag saamgestel. Geen klagtes is teen die bestuurder van die voertuig gelê nie.
Kabelo Mosito, munisipale woordvoerder, het gesê die munisipaliteit is in die proses om ’n siviele eis teen die bestuurder te bring.
Mosito het gesê hierdie is nie die eerste keer dat belangrike infrastruktuur van die dorp deur motorryers beskadig word nie.
Morkel Booyse, versekeringsmakelaar van Bela-Bela, het in reaksie aan Die Pos gesê beurtkrag het vanjaar ’n ongekende toename aan eise teweeg gebring. “Daar is sommige dae tot tien eise wat spruit uit skade wat kliënte weens beurtkrag ly,” het hy gesê.
- Eskom het vroeër ’n verklaring uitgereik wat lui dat beurtkrag vir die volgende 18 maande gereeld toegepas sal word terwyl dringende herstelwerk by hul aanlegte gedoen word.