Tiaan Lottering en Pieter Gideon Jacobs is op Donderdag 6 Februarie skuldig bevind op aanklagte van aanranding met die doel om ernstig te beseer nadat hulle met twee broers, Peet en Jacques Oberholzer, in ’n vuisgeveg betrokke was. Hulle is nie skuldig bevind op ’n klag van poging tot moord nie.
Die hof het gehoor dat die twee beskuldigdes ’n drankie by ’n kuierplek buite die dorp gedrink het, toe die vuisgeveg uitgebreek het. Peet Oberholzer is glo met ’n glas teen die kant van die kop geslaan terwyl sy broer Jacques geslaan is en bewusteloos op die vloer geval het. Hy is glo teen die kop geskop terwyl hy op die grond gelê het.
Die hof het getuienis aangehoor oor die erns van Jacques se beserings. Hy is die volgende dag in die hospitaal opgeneem en het ’n noodoperasie ondergaan weens skedelbreuk en trauma teen die kop.
Lottering is skuldig bevind op twee aanklagte van aanranding met die doel om ernstig te beseer en Jacobs op een aanklag. Hulle het opgeskorte vonnisse van vyf jaar op elkeen van die aanklagte ontvang. Albei is onbevoeg verklaar om ’n vuurwapen te besit.
In sy uitspraak het landdros Pieter Manthata gesê hy glo nie dat hulle moord wou pleeg nie, maar dat hulle moes kon voorsien dat ’n harde hou teen iemand se kop tot hul dood kon lei.
