Die verdagte wat verbind word met verskeie rooftogte in die omgewing van die ou Warmbad-skouterrein, langs die R516-pad na Settlers, het aangedui hy wil ’n borgtogaansoek in die Bela-Bela-landdroshof bring.
Die man is aangekeer nadat die Bela-Bela-polisie verskeie klagtes ontvang het van inwoners wat beroof is terwyl hulle in die veld tussen die township en die dorp geloop het.
Volgens sers. Frans Maponya, Bela-Bela-polisiewoordvoerder, is die man op Vrydag 20 September geskiet tydens ’n onderonsie met die polisie toe hy glo ’n polisiebeampte met ’n mes probeer aanval het toe hulle hom wou ondervra.
Die verdagte het op Maandag 23 September in die hof verskyn op twee aanklagte van roof met verswarende omstandighede.
Maponya het gesê die polisie het die verdagte ondervra, maar daar is steeds onduidelikheid oor sy identiteit, ouderdom of herkoms omdat hy geweier het om dokumentasie aan die polisie te verskaf.
Luidens die klagstaat by die hof is hy Petrus Moyana.
Sy borgtogaansoek is geskeduleer vir Donderdag 3 Oktober.
Die man ontvang intussen mediese behandeling en is onder polisiebewaking.
