Kobus Germishuys, voorsitter van die Kariba-buurtwag, het op Donderdag 12 September tydens die plaaslike veiligheidsvergadering by die Bela-Bela-polisiestasie gesê danksy die veiligheidskameras was daar amper geen inbrake in die omgewing sedert Oktober 2018 nie.
Die buurtwag het sowat twee jaar gelede die behoefte aan kameras, wat op hoë pale gemonteer is, uitgespreek en danksy privaat skenkings kon verskeie kameras in die Bela-Bela- en Modimolle-omgewing opgerig word.
Die doel daarvan was veral om verdagte voertuie en aktiwiteite te moniteer. Beeldmateriaal word aan die polisie en verkeersafdelings beskikbaar gestel om suksesvolle vervolging van oortreders te verseker en misdaad te bekamp, het Germishuys gesê.
Volgens Germishuys is die gebied in die verlede telkens deur inwoners van Soshanguve, Hammanskraal en Mamelodi geteiken. “Hulle pleeg misdaad, word dan deur ’n voertuig opgelaai en verdwyn uit die omgewing. Dit het daarom noodsaaklik geword om alle in- en uitgangsroetes in die omgewing met kameras toe te rus,” het hy gesê.
Volgens hom het die netwerk reeds uitgebrei na Thabazimbi, Settlers en die N1-snelweg. “Die pad tussen Bela-Bela en Modimolle word reeds met groot sukses deur dié kameras dopgehou.”
Volgens hom word plekke waar daar nog nie kameras is nie, soos die R101 na Hammanskraal en die R516-pad na Groblersdal, nou gereeld as ontsnaproetes gebruik. Beplanning is reeds ver gevorder om kameras langs dié roetes op te rig, het Germishuys gesê.
Volgens die polisie is daar steeds voorvalle van diefstal en inbraak in die Eersbewoond-omgewing. Die oortreders maak van voetpaaie gebruik om onder die kameras se oog uit te bly.
Germishuys en sy bestuurspan ondersoek die moontlikheid om ook kameras op dié plekke aan te bring.
Hy het gevra dat plaaslike inwoners, sakelui, asook eienaars van lodges, reservate en gastehuise by dié projek betrokke raak.
Fondsinsamelings vir nuwe kameras word gereeld gehou. Vir navrae bel vir Germishuys by tel. 082 373 2629.
