![](https://images.caxton.co.za/wp-content/uploads/sites/134/2019/07/donkie-beseer.jpg)
Panki Morake (30) ’n donkiekarbestuurder, is op Maandag 8 Julie in die Bela-Bela-landdroshof skuldig bevind op ’n aanklag van dieremishandeling.
Pieter Wagner, eiendomsagent van die dorp, het ’n klag van dieremishandeling by die polisie gelê nadat hy die donkiekar in Van der Merwestraat gesien en gemerk het dat die donkies oop wonde op hul lywe het. Hulle het ook talle kneusplekke gehad en het nie gesond gelyk nie.
Die Dierebeskermingsvereniging (DBV) het die donkies verwyder en behandel. Die twee diere word tans by die DBV-tak in Silverton gehuisves totdat daar vir hulle ’n geskikte huis gevind word.
Die hof het Morake ’n vonnis van ses maande tronkstraf of ’n boete van R3 000 opgelê. Hy het verkies om die R3 000-boete te betaal en is vrygelaat.
Wagner het na afloop van die hofsaak gesê die verantwoordelikheid om misdaad aan te meld, rus op elke wetstoepasser se skouers.
Diere lê hom na aan die hart en hy wil dieremishandeling met wortel en tak uitroei, het hy gesê.