Bianca Henderson het op Vrydagoggend 04:45 haar gebruiklike oggendkoffie gedrink toe sy ’n geraas by haar voordeur hoor.
“Ek het gedog dat dit die honde was, maar toe ek gaan kyk het ek gesien hoe ’n handskoen-hand die deur oopstoot. Ek het geweet hier is nou moeilikheid, want ek het besef dat ek self die spesifieke deur gesluit het.”
Henderson woon net buite die dorp in ’n woonkompleks wat op die perseel van Emmies Verkoeling geleë is. Die perseel is naby aan die Spa Park-woonbuurt.
Twee rowers, van wie een ’n mes in die hand gehad het, het daarna die huis binne gestap. Volgens haar het een ’n swart baadjie met ’n kappie, en die ander ’n rooi baadjie, ook met ’n kappie op, gedra.
Sy het vertel dat die rowers reguit vir haar selfone en ’n skootrekenaar gegaan het. Die booswigte het Henderson nie seergemaak nie.
“Die hele voorval was binne 30 sekondes verby en die twee het verdwyn. Nou is my veilige hawe aan flarde,” het sy gesê. “Ek woon reeds twee jaar hier, maar van die ander inwoners wat etlike jare hier woon, sê daar was nog nooit so voorval nie.”
Die rowers het blykbaar deur die eiendom se heining gekom, het sy gesê.
Henderson, wat by Fun Seekers by die Sondela Natuurreservaat werk, het die naweek ná die voorval by familie gaan woon, maar sy gaan weer volstoom met haar lewe voort.
“Ek moet besig bly. Ek sukkel om te slaap, want alles speel nog voor my oë af. As iets krap of raas dan skrik ’n mens. Maar elke dag gaan dit beter en ’n mens moet net die skok verwerk,” het Henderson gesê.
Sers. Frans Maponya, Bela-Bela-polisiewoordvoerder, het gesê die saak word ondersoek.