Konstabels Lethabo Kekana, Chris Malapane en Thabo Mashiane van die Bela-Bela-polisie se misdaadvoorkomingseenheid het twee verdagtes, onderskeidelik 35 en 40 jaar oud, met 62 sakkies nyaope (’n samestelling van dagga, heroïen en huishoudelike produkte), kontant en spuitnaalde in Zuma View, langs die treinspoor, vasgetrek, het sers. Frans Maponya, polisiewoordvoerder, aan Die Pos gesê.
’n Kondoom is ook by hulle gevind wat volgens Maponya vermoedelik deur dwelmgebruikers gebruik word om bloedtoevoer na hul arms af te bind wanneer hulle hulself met dwelmmiddels inspuit.
Die verdagtes is Bela-Bela-inwoners en sal binnekort in die Bela-Bela-landdroshof verskyn op aanklagte van die besit en die verspreiding van dwelms.
“Ons moet die dwelmprobleem in ons gemeenskap doelgerig en sonder ophou vasvat. Dié inhegtenisname is ’n stap in die regte rigting,” het Maponya gesê.
Die verdagtes is steeds in aanhouding.
Intussen het die Bela-Bela-polisie, reserviste en lede van die gemeenskappolisiëringsforum (GPF) tussen Vrydag 17 Mei en Maandag 19 Mei hul eie misdaadvoorkoming operasie gehou om kwaaddoeners in die omgewing aan te keer.
Maponya het gesê ongeveer 100 verdagtes is dié naweek aangekeer weens onder meer die gebruik van alkohol op straat, dronkbestuur en prostitusie.