“Ons was nog nooit bang nie, want ons het op ’n plaas grootgeword en nog nooit enige probleme met veiligheid gehad nie. Ná al dié inbrake is ek egter te bang om bedags na die hoewe te gaan,” het Marli du Plessis, eienaar van die hoewe, aan Die Pos gesê.
Volgens haar het haar grootouers die eiendom 25 jaar lank besit en bewoon. Hulle het die plaasopstal in 1985 gebou.
Du Plessis se grootouers het in 2016 na Bela-Bela verhuis, waarna Du Plessis en haar man die grond vir weiding vir hul beeste en wild gebruik het. Hoewel die huis meestal onbewoon is, is dit egter steeds deur lede van die familie as vakansiehuis gebruik en het hulle gereeld daar uitgespan.
“Dit was altyd veilig daar. Ek het al meer as een keer alleen daar gebly sonder om bang te wees,” het Du Plessis gesê.
Die eiendom het egter die afgelope twee maande sewe keer erg deurgeloop onder inbrekers.
Gordyne, meubels, beddegoed, huistoestelle en tuingereedskap is tussen Sondag 21 April en Woensdag 15 Mei gebuit. Van die meubels was onvervangbaar, het Du Plessis gesê.
Die ergste was toe diewe begin Mei ’n groot deel van die huis se sinkdak gesteel het.
“Plaasaanvalle is deesdae baie in die nuus. Daar word oral op sosiale media en in die koerante berig oor mense wat op hul plase of hoewes vermoor is. Dit maak nie saak hoe paraat ’n mens is nie: Wanneer mense jou só gewetenloos rot en kaal besteel, sal hulle nie huiwer om moord te pleeg nie,” het Du Plessis gesê.
Die familie het intussen ’n veiligheidswag aangestel om die perseel te beveilig.
Lt. kol. Abel Phetla, waarnemende speurtakhoof by die Bela-Bela-polisie, het gesê hulle is bewus van misdadige aktiwiteite in die Noodhulp-omgewing en ondersoek die sake.
“Dit was die laaste ruk stil daar, maar net een inbraak is reeds een te veel. Beamptes sal hierdie omgewing meer gereeld patrolleer.”
Hy het gesê die R516-pad tussen Thabazimbi en Bela-Bela sal meer gereeld gepatrolleer moet word, want boosdoeners gebruik dikwels hierdie roete.
“Die Noodhulp-buurtwag is ook in die proses om hergestruktureer te word,” het Phetla gesê.
Du Plessis het gesê sy dink, soos talle ander inwoners, met heimwee terug aan die dae toe dit veilig was om daar te woon. “Ek hoop dat ons almal weer veilig kan voel as ons Saterdae saam met vriende en familie braai. Ons wil nie saans met slaaptyd met een oog oop of ’n pistool onder die kussing slaap nie,” het sy gesê.