Cornelius van der Walt (55) en ’n Pretoriase prokureur, Jan-Spruyt Steenkamp (32), het saam met 10 verdagtes op Donderdag 9 Mei in die hof in Ermelo verskyn op klagtes van veediefstal en die besit van gesteelde eiendom nadat 334 beeste ter waarde van R3,1 miljoen glo gesteel is. Die sake teen sewe van die mans is teruggetrek. Van der Walt en Steenkamp verskyn op Vrydag 17 Mei weer in die hof saam met Sibusiso Mabuse (43), Lucas Magagula (35) en Vusi Mhlongo (34) om aansoek te doen vir borgtog.
Die inhegtenisname op Maandag 6 Mei volg glo op wekelange harde werk deur die polisie en veiligheidsgroepe om veediewe wat in die Breyten-omgewing bedrywig was, vas te trek. Die deurbraak het gevolg nadat die veediefstaleenheid in Middelburg inligting ontvang het dat die groep beplan om op ’n plaas naby Breyten toe te slaan, het brig. Leonard Hlathi, polisiewoordvoerder, gesê. Die vermeende ediewe is voorgelê en daar is glo gewag totdat hulle twee vragmotors vol gelaai het en besig was om ’n derde een te laai, voordat die polisie toegeslaan het.
Hulle het reeds etlike nagte lank gewag om op die veediewe om toe te slaan.
Daar is beslag gelê op drie vragmotors, ’n bakkie wat glo deur Van der Walt en Steenkamp gebruik is, sowel as R95 000 kontant, het Hlathi gesê.
Volgens ’n bron betrokke by die ondersoek is vragbriewe van die vorige twee vragte beeste in die verdagtes se besit gevind. Dit het aangedui dat die beeste glo na veilingkrale in die Bela-Bela-omgewing geneem is.