![](https://images.caxton.co.za/wp-content/uploads/sites/134/2019/05/dwelms.jpg)
Lede van die polisie se misdaadvoorkomingseenheid het op Dinsdag 7 Mei drie verdagtes wat glo by dwelmhandel betrokke is, in Uitbreiding 6 in die Bela-Bela-township in hegtenis geneem.
Volgens sers. Frans Maponya, Bela-Bela-polisiewoordvoerder, is die drie betrap met altesame 371 g dagga wat in klein sakkies verpak was, asook met ses sakkies vol nyaope. ’n Onbekende bedrag kontant is ook in hul besit gevind, het Maponya gesê.
Die drie is aanvanklik van die besit en verspreiding van dwelms aangekla. Twee van hulle het egter ’n skulderkenning van R200 elk betaal en is vrygelaat.
Een van die verdagtes, Tumelo Matsieng (27), het op Donderdag 9 Mei alleen in die Bela-Bela-landdroshof op dié aanklagte verskyn.
Die saak is uitgestel na Woensdag 15 Mei wanneer hy ’n borgtogaansoek sal bring.
Lt. kol. Abel Phetla, waarnemende stasiebevelvoerder van die Bela-Bela-polisie, het vroeër aan Die Pos gesê die grondwethof het die parlement 24 maande tyd gegun om die grondwet te wysig rakende die gebruik van dagga in privaat gebruik.
Phetla het gesê totdat die parlementêre komitee duidelikheid hieroor gee, bestaan daar geen wetlike voorskrifte oor hoeveel dagga ’n daggagebruiker mag gebruik of by hul woning mag plant nie.
“Mense kan steeds weens die besit of verspreiding van dagga aangekla word indien die vermoede bestaan dat die persoon betrokke is by die verspreiding of verkoop van dwelms,” het hy gesê.