Die Waterberg Karate Academy het op Maandag 13 Julie weer met oefeninge begin. Sensei Nico von Stade het gesê die pandemie het tot gevolg gehad dat van die karatekas weens persoonlike omstandighede nie meer geoefen het nie. Karate kweek volgens hom dissipline en respek, dit bou stamina en bevorder vaardigheid. Groepe moes noodwendig verklein tot agt karatekas wat elk ’n afgemete blok het waarbinne hulle oefen. Die vloere word gesteriliseer ná elke groepsoefening. Die klub oefen van Maandae tot Donderdae van 13:00 tot 18:00 by Hoërskool Warmbad. Vir navrae bel vir Monique von Stade bel by tel. 078 302 2515.
Die meer as 100 dae van inperking het baie inwoners se oefenprogramme gekelder. Veral jongmense het uitlaatkleppe nodig vir die baie opgehoopte energie. Inwoners van Bela-Bela het nou geleentheid om weer die spiere te strek. Tiaan Botes, onderwyser en sportafrigter by Hoërskool Warmbad, het onlangs begin om fiksheidsklasse vir laerskool- en hoërskoolleerders aan te bied. Op die foto oefen die groep op die hoërskool se velde. Om deel te word van die oefengroep, bel vir Botes by tel. 081 015 2867.