Drie leerders van Hoërskool Warmbad het van 20 tot 23 Maart aan die Suid-Afrikaanse atletiekkampioenskap in Port Elizabeth deelgeneem. Henrique Huisamen (skyfwerp), Megan Prinsloo (400m) en Ofentse Mokwena (spiesgooi, gewigstoot en skyfwerp) het in hul onderskeie items uitgeblink. Ofentse kan ook spog met ’n algehele derde plek in gewigstoot. Op die foto is Megan, Chantelle van Schalkwyk (atletiekafrigter), Henrique, Jani van Rooyen (afrigter, worpe) en Ofentse.
Die Valies is met reg trots op Chanel Jacobs (22). Dié gr. 1-onderwyser by Laerskool Vaalwater het haar gradeplegtigheid op Donderdag 7 Maart bygewoon. Sy sê dat alhoewel dit lekker was om terug te keer na die Potchefstroom-kampus waar sy vier harde, maar lekker jare, deurgebring het, was die terugkeer Vaalwater toe soos ’n welkome tuiskoms. Sy is nou ’n Valie in murg en been.