Lede van die departement van omgewingsake se Working on Fire (Wof) se Lesedingspan het op Vrydag 14 September blitsig gereageer om ’n brand in die Melkrivier-omgewing onder beheer te kry. Matema Gwangwa, provinsiale WoF-woordvoerder, het gesê danksy die WoF-personeel en die Modimolle-brandbeskermingsvereniging het slegs 120 ha afgebrand en geen omliggende eiendomme is beskadig nie. Gwangwa het gesê brande ontstaan al hoe meer in die gebied weens die droogte en hoë temperature. Daar was die laaste week 23 ander brande in die provinsie, maar Gwangwa het gesê WoF is gereed en op bystand vir die ergste. Op die foto is die brand wat in die Melkrivier-omgewing ontstaan het.
Die NG Warmbad Moedergemeente hou op Saterdag 6 Oktober, in samewerking met die ATKV Waterberg-tak, ’n ontbyt saam met Mev. Doof Suid-Afrika Lourindia Janssen, om haar te help om geld in te samel. Janssen gebruik hierdie fondsinameling om mense bewus te maak van doofheid en om dowes te help. Bekende sanger Rouel Beukes sal tydens die ontbyt optree, asook die wenners van die ATKV Waterberg-kunsfees. Kaartjies kos R60. Vir meer inligting bel vir Patrys Venter by tel. 084 511 4682 of vir Pikkie Pienaar by tel. 083 747 1790. Foto: Facebook
Die VLU se Olienaandtak in Modimolle het meer geleer oor die siekte listeriose. Jacqueline Odendaal het die probleem met behulp van ’n skyfievertoning aan die vroue verduidelik. Op die foto is haar man, ds. Riaan Odendaal (voor), en agter is Vivienne van der Merwe, Odendaal en Retha Prinsloo. Die tak het ook op Dinsdag 18 September takvergadering gehou met die studierigting landbou as tema. Die vroue het die boom van die jaar, ’n geelhoutboom, op Prinsloo se plaas geplant. Die Olienaandtak bied aanstaande jaar die Soetdoringstreek se konferensie aan en is hard aan die beplan om geld daarvoor in te samel.
Linda en Steven Korff het op Vrydag 10 Augustus by Tempie Teëls buite Modimolle getrou. Linda is Meisie Bossert van Mookgophong se dogter en Steven is Fanie Korff en Helize Jacobs van Nelspruit se seun. Die egpaar woon in Modimolle.