’n Bus het op Maandag 4 Junie naby die Middelfontein-afrit op die N1-snelweg tussen Modimolle en Mookgophong aan die brand geraak. Kol. Moatshe Ngoepe, provinsiale polisiewoordvoerder, het gesê die busbestuurder het besef dat die bus begin brand het en dadelik stilgehou sodat die passasiers met hul bagasie betyds uit die bus kon kom. Niemand is tydens die brand beseer nie, het hy gesê. Volgens Ngoepe het die bus glo aan die brand geraak weens ’n tegniese probleem. Foto: Verskaf
Ons kyk na die afgelope week se doen-en-late in die Waterberg-gemeenskap.
Warmpatat: Smaaklike happie! ’n Inwoner van Bela-Bela het onlangs ’n baie vreemde brandreuk vanuit sy stoof gekry nadat ’n plaaslike elektrisiën die stoof ’n week gelede herstel het. Daar is later vasgestel dat die elektrisiën vermoedelik sy skroewedraaier in die stoof vergeet het en die vreemde reuk was dié van die skroewedraaier wat begin smelt het.Die fikse inwoners van Renaissance-aftreeoord in Bela-Bela het op Maandag 4 Junie R1 178 aan Kansa Waterbergstreek se Toktokkie-projek geskenk. Saam met hierdie bydrae het die oefengroep vanjaar reeds meer as R5 000 aan hierdie projek geskenk. Die inwoners oefen drie oggende per week by die oord en pleks van ledegeld betaal, skenk hulle geld aan Kansa.