Hoërskool Nylstroom se meisieskrieketspan het die span van Hoërskool Ben Viljoen met 41 lopies geklop tydens hul wedstryd op Woensdag 6 September. Amy-Jane de Villiers is aangewys as speler van die wedstryd met haar goeie boulvertoning waar sy vyf paaltjies geneem het. Anri Briel het 51 lopies aangeteken en ’n paaltjie geneem. Kara van der Merwe het twee paaltjies geneem.
Die Euphorbiaskool in Mookgophong is trots op hul fietsryers wat in die Limpopo-skole fietsryspan opgeneem is. Hier is Herlo Genis, Shani Botha en Michiel Genis wat op Saterdag 16 September in Klerksdorp aan die interprovinsiale-byeenkoms gaan deelneem.Die eerste krieketspan van Hoërskool Hans Strijdom in Mookgophong speel vanjaar uithaler krieket. Hulle het op Saterdag 12 Augustus teen Hoërskool Ellisras te staan gekom. Die Hansie-kolwers het behoorlik kolf geswaai en die wedstryd met 71 lopies gewen. Hierdie span is reg vir die seisoen wat voorlê.
