MODIMOLLE: Adopt-a-pothole se span het ingespring om die pad wat vanaf die R33-deurpad by Alzu Voere tot in Kerkstraat, Modimolle, strek, te herstel. Sarie van den Berg het aan Die Pos verduidelik dat Alzu Voere reeds 28 sakkies teer geskenk het wat nou saam met nog 22 sakkies wat met fondse van die Wilde Weste-aand aangekoop is, gebruik het om sowat 50 slaggate te herstel. Die span, onder leiding van Adolf van den Berg, het vroegoggend begin met die uitsny van slaggate waarna dit met warm teer opgevul en met bitumen geseël is. Laastens is die gate met die munisipaliteit se kompakteerder vasgestamp. Die reën wat omstreeks 14:00 uitgesak het, het hul ongelukkig verhinder om verder te werk. “Ons wil graag al die inwoners wat betrokke was, bedank, asook vir Pieter Bezuidenhout van Megs wat op eie onkoste die sakkies teer in Rooiberg gaan haal het,” het Sarie gesê. Daar word dringend gevra vir nog bydraes vanuit die gemeenskap om die res van Maroelastraat asook Buffalostraat te herstel. Bel gerus vir Sarie by tel. 082 882 2131 om betrokke te raak by hierdie gemeenskapsprojek.
Die ATKV Waterberg-takbestuur het die gashere bedank wat hul persele in Augustus beskikbaar gestel het vir ’n baie suksesvolle Waterberg kunstefees-byeenkoms. Die bestuur het dit goed gedink om vir Louis Cilliers (bo), skoolhoof van Hoërskool Warmbad, asook vir past. Johnathan en Naomi Mouton (onder), leraarspaar van die AGS kerk in die dorp, splinternuwe mikrogolwe te skenk vir hul tyd en die gebruik van hul fasiliteite. Saam met hulle is Amanda Jansen van Vuuren, ATKV Waterberg-takvoorsitter, asook voorsitter van die Waterberg Afrikaanse Kunstefees (WAK).