Die Bela-Bela-munisipaliteit het besluit om weekliks ֹ’n spesiale raadsvergadering te belê wat deur alle raadslede en hoofde van departemente bygewoon moet word. Dit is om enige verwarring in die oorvleueling van departemente se werksaamhede uit te skakel en sodoende dienslewering te verbeter. JeeDee Cloete, VF Plus-raadslid, het met dié voorstel vorendag gekom. Gloria Seleka, burgemeester en tegnici het kort ná die vergadering die Bosveld-inkopiesentrum in die dorp besoek om diensleweringsprobleme wat by herhaling aangemeld word te ondersoek. Sy het ’n span aan die werk gesit om die oorgroeide gebied al langs die sentrum se heining te verwyder. Die vullis is na ’n herwinningsaanleg in die dorp gestuur. Marnus Luüs, sentrumbestuurder, het dié optrede verwelkom en gesê dit sal die aansien van die dorp verbeter aangesien hierdie sentrum die eerste indruk is wat besoekers kry wanneer hulle oor die brug ry.
Die Pos se landbou-bylae wat in Julie as deel van die koerant verskyn het, is deur die Caxton-mediagroep aangewys as maandwenner van alle bylaes in gemeenskapskoerante in dié groep se stal. Willie Nel was verantwoordelik vir die uitleg, die advertensiespan onder leiding van Maria Oberholzer het die advertensies gewerf en die nuusspan het vir die berigte gesorg. Die beoordelaars het die bylae geprys as nuuswaardig met sommer heelwat positiewe landbounuus, interessante stories en waarde vir geld vir die adverteerders.Die Pos se personeel in Modimolle het in Februarie vanjaar ’n waterlekkasie op die hoek van Vos- en Kerkstraat, by die plaaslike owerheid aangemeld. Nadat die munisipaliteit se tegniese span die klagte ondersoek het, is ’n groot gedeelte van die sypaadjie in Vosstraat, reg voor Assupol se kantoor, oopgegrawe om die hoofpyplyn te herstel. Die herstelwerk het bykans vyf maande geneem en die gat is uiteindelik op Dinsdag 26 Julie weer toegegooi. Intussen het daar ’n nuwe lekkasie onder die padoppervlak gevorm, skaars 5 m van waar die waterpyp herstel is. Hierdie lekkasie is gelukkig op Dinsdag 2 Augustus deur Van Waveren-loodgieters se bekwame span herstel met behulp van privaat befondsing. Wiets Botes, nuutverkose wyksraadslid het gesê: “Ons wil graag die munisipaliteit en Van Waveren-loodgieters bedank vir die herstelwerk. Amptenare moet voortaan meer aandag skenk aan die onderhoud van ons dorp se infrastruktuur.”
