Warmpatat: Inwoners van Bela-Bela is baie dankbaar oor talle straatligte wat ná jare weer werk. Ongelukkig skep die nuwe straatligte ook weer geleenthede vir vandale om die komponente te steel. Op die foto is ’n kragpaal in Ludorfstraat waar ’n inwoner besluit het om die lamppaal te beveilig met ’n foeliebak en gewone kabelbinders om die komponente te beskerm.
Amptenare van die Bela-Bela-munisipaliteit het op Woensdag 6 Julie die nuwe pad-kruising na die Bela-Bela-township vanaf die R101-pad na Modimolle geopen. Die projek is danksy ’n regeringstoelaag van R8 miljoen gebou. Die nasionale spoorweë (SAR) en die Suid-Afrikaanse nasionale padagentskap (Sanral) het as koördineerders opgetree. Die township beskik nou oor sewe amptelike ingange. Jamela Selapyane, waarnemende munisipale bestuurder, staan met Gloria Seleka, burgemeester van Bela-Bela, op die foto.Warmpatat: Die verkeerseiland op die hoek van Minnaarstraat en Pretoriaweg in Bela-Bela spog deesdae met nuwe vullishope tussen die munisipale tuine. Sakeondernemings in die omgewing wat kameras het, is op die uitkyk vir die skuldiges.