Verslae weduwee, per e-pos, skryf:
Ek wil graag ’n paar vrae stel aan getroudes wat dikwels, wetend of onwetend, weduwees seermaak met hul opmerkings of gedrag.
Ek wil benadruk dat daar wel uitsonderings is en daarvoor is ’n mens baie dankbaar.
Om watter rede bejeën sekere mense weduwees met soveel agterdog en minagting?
Het hulle werklik rede om dit te doen?
Het die weduwee jou ooit regtig rede gegee om te dink dat sy by jou man of enige ander man aangelê het?
Is jy besig om haar ’n les te leer of is jy net jaloers op haar?
Het jy al ooit daaraan gedink dat jy meer emosionele skade aan jouself doen as aan die weduwee?
Geniet jy dit om iemand hartseer te sien?
Is jy bewus daarvan dat ander mense ook terdeë bewus is van jou houding teenoor jou gewese vriendin?
Weet jy dat jy heel moontlik ook ’n weduwee gaan word en ook só behandel sal word deur mense wat jy as jou vriendinne beskou het?
Hoeveel vriendinne het jy self nog oor? Is jy werklik trots op die beeld wat die weduwees en medekennise van jou het?
Wil jy nie eerder geken word as ’n vriendelike-, omgeevriendin nie?
