’n Oopgebreekte elektriese kragverde-lingkas in Thabo Mbekistraat (voor die Modi Joy Supermark en Drankwinkel in Modimolle) hou ernstige gevaar vir inwoners in. Op die oog af lyk die driefasekrag- kabels binne-in die kas reg, maar ’n elektrisiën wat die foto gesien het, het aan Die Pos verduidelik hierdie is ’n onwettige aansluiting. Boonop moet sulke kaste te alle tye gesluit wees sodat niemand met die kabels kan peuter nie. Volgens hom is die aardlekstroombreker omseil deurdat al die kragkabels bo by die invoerkabel gekoppel is en met geen kabels onder die stroombreker nie. In die geval van ’n kortsluiting of oorbelading is daar geen beskerming vir die kabel nie — wat beteken die kabel kan iemand doodskok en die hele kragverdelingkas laat uitbrand. Inwoners word gemaan om versigtig te wees en ’n beroep word op amptenare gedoen om instandhoudingswerk by dié kas te doen.
’n Woonhuis is die afgelope naweek erg beskadig tydens ’n brand in Bothastraat in Bela-Bela. Nooddienspersoneel was gou op die toneel en geen ander eiendom het skade opgedoen nie. Volgens Scott Ramasetse, ’n huurder op die perseel, vermoed hy die brand het in ’n slaapkamer ontstaan. Ramasetse en ander inwoners wat hom te hulp gesnel het, het gepoog om meubels en besitting uit die huis te verwyder voordat die vlamme dit verwoes. Ramatsetse het ligte brandwonde aan sy hand opgedoen terwyl hy meubels probeer red het. Die vlamme het egter die meeste van die eiendom verswelg. Die polisie het die toneel op Maandag 15 November besoek en stel ondersoek in oor die ontstaan van die brand. Geen brandstigting word tans vermoed nie. Die eienaars van die huis was nie tuis toe die brand uitgebreek het nie. Mense wat die inwoners in hul nood wil help, kan Ramatsetse bel by tel. 073 786 6333.Lizaan Faber van die Vroue Landbou-unie (VLU) se Naboomspruit-tak het ’n heerlike uitstappie vir lede van die Naboomspruit- en Mabalingwe-takke na die legendariese Ina Lessing van Modimolle gereël. Lessing het die vroue toegespreek en verras met ’n heerlike boere-ontbyt. Op die foto is Riana Oosthuizen (Bosveldstreek-voorsitter), Ria Strydom (VLU Noord-president), Lilian Weber (Soetdoringstreek-voorsitter), Neriche Lessing, Nicolet Lessing en die kleine Martene Lessing. Agter hulle staan Mariëtte van Wyk, Ina Lessing, Danie Lessing, Natan Lessing en Jana Lessing.